മിനെയ്റോയിലെ ബെലോ ഹൊറിസോന്റിയില്‍ അന്ന് മഞ്ഞക്കടല്‍ കണ്ണീര്‍ വാര്‍ത്തെങ്കില്‍ ഇന്ന് ആനന്ദകണ്ണീരാണ് പൊഴിഞ്ഞത്. ഇരുപകുതികളില്‍ നിന്നായി ഓരോ ഗോള്‍ വീതം നേടിയ ബ്രസീല്‍ എല്ലാ അര്‍ത്ഥത്തിലും അര്‍ജന്‍റീനയെ അപ്രസക്തരാക്കിയ പ്രകടനമാണ് നടത്തിയത്
മിനെയ്റോ: 2014 ലോകകപ്പില്‍ ജര്‍മനി കശക്കി എറിഞ്ഞ മണ്ണില്‍ അര്‍ജന്‍റീനയെ കീഴടക്കി ബ്രസീലിന്‍റെ കുതിപ്പ്. മിനെയ്റോയിലെ ബെലോ ഹൊറിസോന്റിയില്‍ അന്ന് മഞ്ഞക്കടല്‍ കണ്ണീര്‍ വാര്‍ത്തെങ്കില്‍ ഇന്ന് ആനന്ദകണ്ണീരാണ് പൊഴിഞ്ഞത്.
ഇരുപകുതികളില്‍ നിന്നായി ഓരോ ഗോള്‍ വീതം നേടിയ ബ്രസീല്‍ എല്ലാ അര്‍ത്ഥത്തിലും അര്‍ജന്‍റീനയെ അപ്രസക്തരാക്കിയ പ്രകടനമാണ് നടത്തിയത്. കാനറികള്‍ക്കായി ഗബ്രിയേല്‍ ജീസൂസും റോബര്‍ട്ടോ ഫിര്‍മിനോയും വലചലിപ്പിച്ചു. കളിയുടെ തുടക്കത്തില്‍ ഒന്ന് പകച്ച് നിന്ന അര്‍ജന്‍റീനയെ ഞെട്ടിച്ചാണ് കാനറികള്‍ ആദ്യ ഗോള്‍ നേടിയത്.
അര്‍ജന്‍റീനയുടെ മധ്യനിരയും പ്രതിരോധ നിരയും ഒരുപോലെ കീഴടങ്ങിയ മുന്നേറ്റത്തിന്‍റെ സൂത്രധാരന്‍ ബ്രസീല്‍ നായകന്‍ ഡാനിയേല്‍ ആല്‍വസായിരുന്നു. മെസിയുടെ മുന്‍ സഹതാരത്തില്‍ നിന്ന് പന്ത് ലഭിച്ച റോബര്‍ട്ടോ ഫിര്‍മിനോ അത് ഗോള്‍ പോസ്റ്റിന് മുന്നില്‍ കാത്ത് നിന്ന ഗബ്രിയേല്‍ ജിസൂസിന് മറിച്ച് നല്‍കി.
കാല്‍പ്പാകത്തിന് വന്ന ക്രോസ് ഗോളിലേക്ക് മറിച്ച് വിടേണ്ട ഉത്തരവാദിത്വം മാത്രമായിരുന്നു ജിസൂസിനുണ്ടായിരുന്നുള്ളൂ. ഒരു ഗോള്‍ വഴങ്ങിയതോടെ അല്‍പം കൂടെ ഉണര്‍ന്ന് കളിക്കാന്‍ അര്‍ജന്‍റീനയ്ക്ക് സാധിച്ചു. എന്നാല്‍, ഒട്ടും ഒത്തിണക്കവും അനുഭവസമ്പത്തും ഇല്ലാത്ത അര്‍ജന്‍റീനിയന്‍ നിരയ്ക്ക് ബ്രസീല്‍ പ്രതിരോധത്തിലെ വിള്ളലുകള്‍ മുതലാക്കാനായില്ല.
മെസിയുടെ ചില നീക്കങ്ങളും ഒരു ഫ്രീകിക്കും മാത്രമാണ് അര്‍ജന്‍റീനക്കാര്‍ക്ക് സന്തോഷിക്കാന്‍ ബാക്കിയായത്. ആദ്യ പകുതിയില്‍ പന്ത് കൂടുതല്‍ നേരം കെെയില്‍ വയ്ക്കാന്‍ ബ്രസീലിന് സാധിച്ചെങ്കിലും ഗോള്‍ നേടിയതൊഴിച്ചാല്‍ കാര്യമായ മികച്ച നീക്കങ്ങള്‍ ഒന്നും മഞ്ഞപ്പടയുടെ ഭാഗത്തു നിന്നുമുണ്ടായില്ല.
16,386 comments